གངས་རིའི་མིའམ་མི་མ་ཡིན་དང་པོ།

ས་ཡ་གསུམ་གྱི་སྔོན་ཙམ་ལ། མི་ཡི་རིགས་རྒྱུད་བྱུང་ཟེར་བ། འབུམ་ཕྲག་གཉིས་གསུམ་སྔོན་ཙམ་ལ། མེས་པོ་ཨ་ཧྥེ་རི་ཀ་ནས། ཕྱོགས་བཞི་མཚམས་སུ་ཁྱབ་པར་གྱུར།། ཁ་ཅིག་ནུབ་ཀྱི་གྲང་སར་སོང་། ཁ་ཅིག་བྱང་གི་ཐང་ཆེན་བརྒལ། ཁ་ཅིག་ཉི་ཤར་ཕྱོགས་སུ་བསྐྱོད། མི་རབས་སྐྱེ་ཞིང་མི་རབས་འདས།། རི་བོ་བརྒལ་ནས་བྱེ་ཐང་བརྒལ། གཙང་པོ་བརྒལ་ནས་གངས་ཁྲོད་བརྒལ། ལོ་ཁྲི་མང་པོའི་ལམ་དུ་བསྐྱོད། མི་རྒྱུད་ས་ཆེན་ཀུན་ཏུ་གྱེས།། ཤར་ཕྱོགས་མི་རྙིང་རྒྱུད་པ་ཞིག ས་མཐོའི་ཡུལ་དུ་སླེབས་པའི་ཚེ། རླུང་ནི་སྲབ་ལ་དགུན་ནི་རིང་། གངས་ཀྱིས་རྩེ་མོ་དཀར་པོར་གཡོགས། སྡོད་ས་བདེ་མོ་མ་ཡིན་ཡང་། དེ་རུ་མི་རྣམས་ལུས་ཏེ་སྡོད།། དེ་ཚེ་བོད་ཅེས་མིང་ཡང་མེད། རྒྱལ་པོ་མེད་ཅིང་གྲོང་ཁྱེར་མེད། ལྷ་ཁང་མེད་ཅིང་དགོན་པ་མེད། གངས་རི་དཀར་པོ་རླུང་ཆེན་སྒྲ། མཐོ་སྒང་གནམ་སྔོན་སྐར་ཚོགས་ཙམ།། རྡོ་བ་ལག་ཆར་གྱུར་པ་དང་། མེ་ནི་མཚན་མོའི་ཉི་མ་ཡིན། བྲག་ཕུག་ཁང་པར་གྱུར་པ་དང་། ལྟོགས་པ་ཁྲིམས་ཤིག་གོ་བ་ཡིན། གྲང་ངར་དགྲ་བོ་ཕམ་མི་ཐུབ། དཔྱིད་དུ་རི་དྭགས་རྗེས་སུ་འབྲངས། དགུན་དུ་བྲག་གི་འོག་ཏུ་ཡིབ། ཁོང་གིས་ལམ་མི་ཤེས་མོད་ཀྱང་། ལམ་གྱིས་ཁོང་རྣམས་ངོ་ཤེས་སོ།། ཉིན་ཞིག་མདུན་དུ་རི་བོ་མངོན། གངས་ཀྱི་རྩེ་མོ་ནམ་མཁར་ཟུག ཉི་འོད་ཕོག་ཚེ་དཀར་ཞིང་གསལ། མཚན་མོ་སྐར་འོག་ཁུ་སིམ་ལངས། ཕྱིས་སུ་གངས་ཏི་སེ་ཞེས་བོས། དེ་ཚེ་རི་ནི་རི་ཙམ་ཡིན། ཆུ་ཡོད་རྩྭ་ཡོད་རི་དྭགས་ཡོད། འདི་རུ་བུ་ཡང་སྐྱེ་ཐུབ་བོ།། ལོ་འདས་རྗེས་སུ་ཕྱིར་ལོག་འོངས། མེ་བོའི་ཐལ་བ་གཅིག་ཏུ་འདུས། མཚོ་འགྲམ་དུ་ནི་བུ་ཞིག་སྐྱེས། རིམ་བཞིན་འཁྱམས་པའི་རྐང་བ་དལ། ལོག་འོངས་རེ་རེས་ས་ཆེན་ངོས།། ས་མཐོས་དབུགས་ལེན་སློབ་པར་བྱས། གྲང་ངར་གྱིས་ནི་བཟོད་པ་བསླབས། གངས་རིས་གཟུགས་པོ་བསྒྱུར་བ་དང་། མཐོ་སྒང་རླུང་གིས་ཁྲག་བོ་བསྒྱུར།། གནའ་བོའི་ཏན་ནེ་སོ་ཝའི་མི། གངས་རིའི་བྲག་ཕུག་ཏུ་འཚོ་བ། ཁོ་ཚོའི་རུས་པ་ས་འོག་ལུས། ཁོ་ཚོའི་ཁྲག་ནི་མ་ཡལ་བར། དབུགས་ལེན་གྱི་ནུས་སྦྱིན་པ་ཡིན། མགོ་ནག་བོད་ཀྱི་མེས་པོ་ཡིན།། ལོ་རྒྱུས་མཁན་གྱིས་མིང་མ་བྲིས། དུས་ཀྱིས་མིང་རྣམས་བསུབས་པ་དང་། རླུང་གིས་རྐང་རྗེས་བསུབས་པ་དང་། ཡལ་བར་གྱུར་ཀྱང་ཡལ་མ་ཐུབ། ཁྲག་གི་ཐིགས་པ་རྒྱུད་དུ་བརྒྱུད། དྲན་པ་ཤ་དང་རུས་ལ་ལུས།། དུས་ཕྱིས་མི་རབས་གསར་པ་ཞིག གངས་རིའི་ཡུལ་དུ་སླེབས་པའི་ཚེ། ས་འདི་མཐོང་མ་མྱོང་མོད་ཀྱང་། ཁྲག་གིས་ས་འདི་ངོ་ཤེས་སོ། གངས་རི་མཐོང་མ་མྱོང་མོད་ཀྱང་། རུས་པས་གངས་རི་དྲན་པར་གྱུར།། རི་ཡིས་དྲན་པ་མ་བརྗེད་དོ། ཆུ་བོས་དྲན་པ་མ་བརྗེད་དོ། ཁྲག་གིས་དྲན་པ་མ་བརྗེད་དོ། རྨི་ལམ་ནང་དུ་གངས་རི་མཐོང་། མེ་ཡི་དྲོད་ལ་ངོ་ཤེས་ཚོར། རླུང་གི་སྒྲ་ནི་དྲན་པ་ལས། རྒྱུས་ཆེ་བའི་སར་ནས་འོངས་སོ། དེ་ནི་ཁྲག་ཏུ་གཉིད་པའི་དྲན། མགོ་ནག་བོད་ཀྱི་མེས་པོ་ཡིན།།